1/1

Антонина Семёновна Кривощекова-Гантман (1921-1995 гг.).

Октябрь 1 лунö 2017 годö Кудымкарскöй педагогическöй училище отметитiс 90-годся юбилей. Пермскöй музыкальнöй колледж (1924 г.) бöрсянь сiя пырö профессиональнöй образованне учрежденнеэзлöн пятеркаö, кöдна оссисö Пермскöй крайын  XX век пондöтчикö. Öкмыс десятилетиеöн Кудымкарскöй педагогическöй училищесö кончитiсö не öтiк тысяча специалист, кöдна успешнöя уджалiсö и уджалöны Пермскöй крайись челядь саддэзын да школаэзын.

Талун миян рассказыс лоас посвятитöм педагогическöй училищелöн öтiк выпускницалö, медодзза ученöй инькалö, кöда чужис Коми-Пермяцкöй округын, - Антонина Семеновна Кривощекова-Гантманлö (1921-1995 гг.). Коми-пермяцкöй кыв велöтöм сьöртi научнöй школалöн аркмöтiсь чужис Юсьвинскöй районiсь Вежелево деревняын. Кöр сылö вöлi 14 год, поступитiс Кудымкарскöй педагогическöй училищеö, кöдö кончитöм бöрын год уджалiс челядь садын воспитательницöн. Сыбöрын 19-годся нывка керö оськöв, кöда öнöдз дивуйтö быдöнöс.

«Кыдз деревенскöй нывка тöдiс Ленинградскöй университетын финно-угорскöй отделенне йылiсь, кин советуйтiс поступитны именно сiя öддьöн ылiсь вузö? Сiя кадö медматiсь железнодорожнöй станцияöдз колiс мунны сутки да джынся не етшажык. Мыля Антонина Семеновна эз сувтчы Перемись или Сыктывкарись высшöй велöтчан заведеннеэз вылын?» - сетö юасьöм А. С. Лобанова, А. С. Кривощекова-Гантманлöн ученица, Пермскöй государственнöй гуманитарно-педагогическöй университетiсь филологическöй факультетiсь коми-пермяцко-роч отделенне вылiсь деканлöн вежись («Зов предков», с. 25).. Антонина Семеновна 1939 годö поступитiс А. С. Пушкин нима Ленинградскöй университетiсь восточнöй факультетлöн финно-угорскöй отделенне вылö. Сылöн научнöй руководительöн и наставникöн лоис Дмитрий Владимирович Бубрих, наукаэзлöн доктор, СССР-ись наукаэзлöн Академияись член-корреспондент, отечественнöй финно-угроведеннелöн аркмтсь.

Фундаментальнöй академическöй лöсьöтчöмыс, целеустремленностьыс да повтöмыс сетсö возможность Антонина Семеновналö дорйыны диссертация «Словарный состав, словоизменение иньвенского диалекта коми-пермяцкого языка» тема сьöрт, а куим год бöрт, 1955 годö лоны Молотовскöй педагогическöй университетын, öн Пермскöй государственнöй гуманитарно-педагогическöй университет, национальнöй отделенне аркмöтсьöн.

Антонина Семеновна керис вузовскöй учебнöй программаэз, гижис научнöй да популярнöй уджжез ономастика сьöртi. Сы авторство увтын 1973 годö петiс книга «Откуда эти названия?», кöдаын интереснöя висьтассьö Пермскöй крайись населеннöй пункттэзлöн да юэзлöн ниммез аркмöм йылiсь. Историческöй да лингвистическöй параллеллез Антонина Семеновна адззö коми-пермяцкöй, коми-зырянскöй, удмуртскöй, угорскöй, мансийскöй, хантыйскöй, волжско-болгарскöй, башкирскöй, татарскöй, западно-сибирско-тюркскöй да роч кыввезiсь. Книгаыс кончайтчö необычнöй приложеннеöн «Памятка для сплошного обследования топонимического микрорайона», кöдаын сетсьöны методологическöй рекомендацияэз ономастика сьöртi исследованнеэз чулöтöм понда. Сiя вöлi лöсьöтöм Всесоюзнöй Географическöй обществоись Пермскöй отделлöн, ономастика, фольклор да этнография секцияöн.

Справка: ономастика- вуджöтны кö древнегреческöй кыв вылiсь, лоö «ниммез сетны искусство», языкознаннелöн раздел, кöда велöтö собственнöй ниммез, ны шогмöмлiсь историясö да нылiсь вежсьöммесö кыв-источникын дыр употребляйтöмсянь или мöдiк кыввезiсь заимствуйтöмсянь.