Кудымкар − Пермскöй крайись важ населеннöй пункт. Нельсегодся унажык ни сiя сулалö Кува да Иньва береггез дорын. 19 векся 30 воэзсянь Кудымкор посад лоö Пермскöй губерниялöн Соликамскöй уездiсь вöра крайлöн административнöй центрöн. Эстöн олiсö да уджалiсö отир, кöдна аркмöтiсö öнняся экономика, социальнöй сфера, культура зоралöм понда основасö.

Дассизимвося арö Петроградын гымнитiс Октябрьскöй революция, кöда уна вежис Россия да Кудымкор оланын. 1925 воö посад лоö вились аркмöм Коми-Пермяцкöй национальнöй округлöн столицаöн. Кынымкö во сьöрна эстöн оссьöны училищеэз, техникуммез, библиотека, драматическöй театр, книжнöй издательство. Июль 10 лунö 1938 воö Советтэз Всероссийскöй съездлöн Всероссийскöй центральнöй исполнительнöй комитет решенне сьöртi Кудымкор примитö карлiсь статус.

Мöдiк годö коми-пермяккезлöн дзир öтiк карлö тырас 80 во. Кудымкарлöн городскöй Администрация корö пондöтны юбилейлiсь порйöтöмсö «Город коми-пермяков» молодежнöй просветительскöй проектсянь. Мийö корам быдöс кудымкарсасö да карлiсь гöссесö кыкьямыс городскöй десятилетиеöт прогулка вылö. Ноябрь 6 лунсянь декабрь 7 лунöдз сайт вылын пондасö публикуйтчыны Кудымкар да сы олiссез йылiсь, кöдна «дзик öтiк кирпичöн» аркмöтiсö öння оланлiсь пространствосö, историяэз.

8 декабрьсянь 10 декабрьöдз быд морт, Кудымкарись или Коми-Пермяцкöй округлöн районнэзiсь, Пермскöй крайись или Россияись олiсь, вермас участвуйтны Историческöй вермасьöмын. Сетö ответтэз коми-пермяккезлöн кар история йылiсь 30 юасьöм вылö, получитö просветительскöй проектлiсь сертификат да висьтасьö асланыт осьтöммез йылiсь ерттэзлö!

Декабрь 14 лунö мийö видзчисям быдöннытö «Кудымкар-этö…» молодежнöй форум вылын, кöда керас итоггез просветительскöй проект сьöртi. Форумнöй площадкаэз вылын мийö пондам баитны сы йылiсь, кытшöм эм Кудымкарлöн образыс сы олiссезын, и кыдз миян дзаррез вермасö туйдöтны матiсь кадын городлiсь успешнöй зоралöмсö. Думайтыштам öтлаын, кыдз баитiсö миян предоккез: «Öтiк пу-не пожумаин»!