Сiдз уджалiсö застойнöй годдэзö
«Сiдз шусяна застойнöй годдэзö (XX векся 70-80 годдэз) Пермскöй областьын мунiс некокнит удж: строительство мунiс ыджыт темппезöн, объеммес вöлiсö ыджытся-ыджытöсь. Строитсисö Чайковский, Лысьва, Добрянка, Коми округ… Мийö Кудымкарсö городö пöртiм!» - энö кыввесö висьталiс Борис Всеволодович Коноплев, Пермскöй обком КПСС-лöн первöй секретарь.
Эна годдэзö окружнöй партийнöй организациялöн первöй секретарьöн вöлi Анатолий Михайлович Зубов. Чужан места сьöртi сiя вöлi Кудымкарись, образованне сьöртi историяöн велöтiсь, призванне сьöртi талантливöй юралiсь. Б. В. Коноплев лыддис, что Кудымкарлöн да Коми-Пермяцкöй округлöн успешнöй зоралöм понда «неетша отсалiсö Зубовлöн заинтересованность да целеустремленность. Округись активкöт пантасьöммесö мийö чулöтлiм год вылас кыкся не етшажык, вопроссэсö сувтöтлiм медъесяöсь. И решайтчисö нiя чожа» (стр. 223 «Своих убеждений не меняю»).
И се жö кыдз зорамис Кудымкарыс застойнöй годдэзö? Борис Всеволодович уськöтö тöдвылö:
«Первуись ме локтi Кудымкарö эшö 1950 годдэзö. Сiя вöлi ыджыт пуовöй селоöн. Сэтчин эз вöв надежнöй электроснабженне, электричествосö получайтiсö дизельнöй генераторрезсянь, и сiйöн, кыдз только мийö кончитiм строитны Камскöй ГЭС, сразу жö пондiм кыскыны электропередачаэзлiсь линия. Кончитiм сiйö 1961 годö и сразу пондöтiм строитны туй Пермь-Кудымкар. Туйсö эд перво не асфальтированнöйö строитiм, а брусчатöйö. Öддьöн сьöкыт вöлi строительствоыс. А 1980 годдэзö уже сэтшöм туйезлöн сетьыс вöлi округас, что Кудымкарсянь ветлiс 40 автобуснöй маршрут! Транспортыс нормализуйтчис: семидесятöй годдэзö Кудымкарын строитiсö аэродром, и учöт Ан-2 да Як-12 ветлiсö этчö-сэтчö областнöй центрсянь да бöр ЧП-тöг да авиакатастрофаэзтöг. 1980 годдэзö Кудымкарыс просто югмис. Западнöй Сибирьын нефтянöй бум пондтчытöдз эта вöлi СССР-ын медыджыт окружнöй центр».
2015 годö Анатолий Михайловичыс эз ло. «Парма» газетаын вöлi публикуйтöм бытшöм статья (http://xn--80aaaalnn7bzals.xn--p1ai/?p=59422) В. Ивановлöн, кöда уна год уджалiс КПСС-лöн окружнöй комитетын и бура тöдiс энö бытшöм морттэсö. «Ме понда вöлiсö и кольччасö кык морт, кöдна лоöны примерöн чужан мулö да Родиналö служитöмын. Ме гордöя висьтала нылiсь ниммесö: Борис Всеволодович Коноплев да Анатолий Михайлович Зубов». Былись, эна кык мортыс öтлаöтiсö ас пытшканыс медбур качествоэсö государственнöй, партийнöй да хозяйственнöй руководительлiсь,кöда бура тöдö сталинскöй кыввез – «кадррез керöны быдöс», чуткöйöсь да отзывчивöйöсь, мыдзтöм уджалiссез да бур ерттэз.
