1/1

Галантерейный отдел универмага

Шоныт кроватьын лампалöн чуть тöдчана би дырни лыддьöттöг.

Индустриальнöй цивилизациялöн благоэз лоисö Кудымкарын не öтiк кадö. Пондöтам медглавнöйсянь – электричествосянь. Чулалiс 90 год, кыдз öзйис медодзза лампочка. 1954 годöдз электричествосö шедтiсö местнöй учöт мощностя подстанцияэз. Дзир сэк, кöр строитiсö ЛЭП «Пермь-Кудымкар-Гайны», качествоыс эта электросвязь услугаэзлöн лоис устойчивöй.

Централизованнöй теплоснабженнеыс Кудымкарын лоис сэк, кöр пондiсö чожа строитны унаэтажа керкуэз, но 1987 годöдз мукöдас уджалiсö кочегаркаэз.Этасянь тшыныс Кудымкар весьтын сулалiс коромыслаöн. 1980 годдэз конецö вопросыс централизованнöй теплоснабженнеöн вöлi решитöм.

Аслат квартираö соддэз кузя дыр да бур кайöмтöг.

1966 годö порйöтiсö новоселье горожана, кöдна пырисö медодзза витэтажа керкуö. Унаэтажа строительствоыс кыссис 1990 годöдз, кöр Кудымкарыс вöлi пыртöм Россияись учöт историческöй городдэзлöн разряд дынö и пыртöм реставрациялöн,реконструкциялöн да возрожденнелöн государственнöй программаö. Сiйöн öнi городас куим этажся унажык зданнеэзлöн строительствоыс абу тшöктöм.

Душö ветлöм понда кастрюляэзын васö шонтытöг (шоча пантасьлан гожумся традиция).

1960 годдэз шöрын вöлiсö пыртöмöсь оланö водопровод (8,5 км.) и канализация (3,5 км.). Чулалiс эшö 13 год, кöр водоснабженнелöн да канализациялöн системаыс вöлi кольцуйтöм. 1985 год кежö коммунальнöй сеттезлöн кузяыс содiс 66 километрöдз.

Подöна вуджöммез вылын шульгалань да веськытлань юр бергöтлытöг.

Дзир 80-öй годдэзö Дорожно-строительнöй управленне № 3 пондöтiс Кудымкарлiсь благоустройствосö туйез асфальтируйтöмсянь да тротуаррезсянь. 1986 годö вöлi кончитöм объезднöй туй Степаново-Кирзавод. Невнаöн одзжык пондöтчис Кудымкарлöн газификация.

Датасö, кöр Кудымкарын лоис медодзза автомобиль, сувтöтны эз удайтчы. Вермас лоны, что автомобильнöй моторлiсь шысö кудымкарса кылiсö 1920 годдэзö. Точнöя тöдам, что 1984 годö Кудымкарись туйез вылын позис пантавны автомобиль, кöда уджалiс сжиженнöй газ вылын.

Любимöй сериаллiсь медбöрья сериясö телефонöт бöрйöмтöг.

Кудымкарын связь зоралöмлöн историяын уна чочком пятноэз. 1909 годö Кудымкарын вöлi осьтöм медодзза почтово-телеграфнöй отделенне. Если международнöй телефоннöй связьыс Перемын лоис 1930 годö, то туйö предположитны, что Кудымкарыскöт сiя пондiс уджавны 30-öй годдэз конецö. 1954 годö телефоннöй связьыс вöлi бурсьöтöм. Виднö, «воздушкасянь» вуджöтiсö öнняся абонентскöй линияэз вылö. Мобильнöй связьлiсь установитны точнöй датасö сiдз жö оз позь. Туйö предположитны, что Кудымкарын сiя лоис 2005 год бöрсянь. Интернет доступнöйöн кудымкарсалö лоис серöнжык. Компьютер модем пыр включайтчис телефоннöй кабель бердö.

Медодзза радиоузел лоис Кудымкарын 1927 годö, 9 год бöртi вöлi организуйтöм радиовещаннелöн городскöй редакция. Аналоговöй телевиденне лоис Кудымкарын 1971 годö, а 43 год бöртi Кудымкарын олiссез вермисö видзöтны цифровöй телевиденне. Öнi вниманне: 2018 годö пыр кежö мунасö важö привычнöй аналоговöй телевизоррез. 20 привычнöй программа пондас туйны видзöтны дзир телевизоррезöт, кöдналöн лэдзöмыс не серсяжык 2012 годся.