1/1

С трамплина прыгает Николай Отинов. Николай Отинов – инструктор детской спортивной школы, вырастил многих первоклассников-прыгунов с трамплина среди учащихся школ г. Кудымкара. 1959 г

Коми-Пермяцкий окружной государственный архив (Ф. 265).

Скалаэзöн фьорддэз да визыв юэза странаын, Норвегияын, XX век шöрын олiссес думайтiсö виль спортивнöй занятие: трамплин вывсянь чеччалöм да лыжнöй двоеборье. 1924 годö спортлöн эна виддэс лоöны олимпийскöйезöн, но соревнуйтчöны ныын дзир мужиккез.

Первöй инька, кöда босьтiс трамплинсö, выступитiс Сочиын Олимпиада вылын 2014 годö. Инькаэзлöн лыжнöй двоеборьеыс лыддиссьö спортлöн том видöн и öння кадö оз пыр олимпийскöй программаö.

Трамплинсянь чеччалöмсö да лыжнöй двоеборьесö керис популярнöйöн советскöй йöз коласын СССР-ись  ЦИК-лöн «Готов к труду и обороне» (1931 г.) физическöй культураись Всесоюзнöй советлöн проект. Медодзза трамплиныс миян странаын вöлi строитöм Свердловскын. Пермь, сэк эшö Уральскöй областьлöн районнöй центр, öддьöн эз кольччы столицасянь. Первöй соревнованнеэс трамплинсянь чеччалöм сьöртi вöлi чулöтöмöсь городын 1932 годö. 20 год бöртi Перемын  Егошиха ю керöс вылын вöлi медодзза трамплиннöй комплекслöн торжественнöй осьтöм.

Кудымкарын сэтшöм спортивнöй сооруженнеыс лоис серöнжык. Медодзза 20-метровöй трамплин вöлi строитöм 1954 годö, 30-метровöй трамплиныс-1961 годö, 40-метровöйыс-1964 годö. Медыджыт 60-метровöй трамплин (проектыс московскöй архитектор А. Д. Колоднерлöн) осьтiсö 1977 годö I Всесоюзнöй тöвся сельскöй спортивнöй орсöммез кежö.

Февраль конецын Пермскöй областись кынымкö город примитiсö энö престижнöй соревнованнеэсö. Добрянкаын соревнуйтчисö биатлонисттэз, Полазнаын – горнолыжниккез, а Кудымкар лоис трамплинсянь чеччалöмын да лыжнöй двоеборьеын центрöн. Вот кыдз гижö I Всесоюзнöй тöвся сельскöй спортивнöй орсöммез осьтöм йылiсь очевидец: «Город понда зрелищеыс вöвлытöм. Мича, кöдзыт тöв вылын павьялан флаггез, гора музыка, öнöдз адззывлытöм спортивнöй костюммез, кöдна вурöмась Западын, уна спортсменнэз да гöссез. Эта вöлi ыджыт спортивнöй олан дынö павкöтчöмöн».

Соревнованнеэс сетiсö оськöв готовитны трамплинсянь чеччалöмын да лыжнöй двоеборьеын быдса плеяда спортсменнэзöс: А. Распоповöс, И Мазеинöс, Р. Шадринöс, А. Харинöс, Г. Тутынинöс, В. Зубовöс. Ныкöт успешнöя уджалiсö и уджалöны тренеррез: Г. Пупырев, В. Механошин, М. Ососов, Н. Четин, Л. Казаринов, А. Женин, В. Харин да мöдiккез. Нiйö готовитöмын центрöн лоис трамплиннэзлöн комплекс «Парма», кöдаын 2012 годö вöлi лöсьöтöм гожумся трамплин.

Талун Кудымкарлöн гордостьöн лоö Стефания Надымова. 2017 годö сiя лоис Россияись Кубоклöн медодзза победительницаöн, женскöй лыжнöй двоеборьеын Россияись чемпионкаöн да босьтiс золотöй медаль Россиялöн гожумся чемпионат вылын Чайковскийын.