Доктор Калин
Туй кузя гожумся лагерись мунö челядьöн автобус. Шучтыдалана öшын сайын жар шондiа август. Пöжö, купайтчыштны бы кöдзыткодь ваын. Шоферыс кежö ю дорись береглань… Страшнöй катастрофа, кöдаö оз и веритчы. Окружнöй больницаись травматологическöй отделеннеö вайöтiсö 16 мортöс, быд минутаыс дона. Сiя лунö уджалiс Алексей Иванович Калин, волевöй морт, профессионал, кöда бура тöдö ассис уджсö. 20-годся практикаын эта вöлi первöй сэтшöм сьöкыт случай. Алексей Иванович видзöтiс ситуациясö да дженыта висьталiс: «некин оз ло инвалидöн».
Чассэз кыссис операция, кöда йылiсь дас лун сьöрна юöртлiсö СССР-ись министррезлöн Советö, сыбöрын СССР-ись образованнелöн Министерствоö. Кудымкарö командировкаö локтiсö враччез Перемись да Москваись, но нылöн отсöтыс эз ни ков. Алексей Иванович видзис кöсйöмсö – быдöс 16 челядьыс вöлiсö ловьяöсь.
Алексей Ивановичлö уджалiкö вöлi 1983 годö сетöм званне «РСФСР-ись Заслуженнöй врач», 1984 годö наградитöм медальöн «Ветеран труда», 1985 годö наградитöм обком президиумлöн да Пермскöй облздравлöн Почетнöй грамотаöн, неöтпырись сетлiсö благодарносттез, добросовестнöй да унагодся удж понда Почетнöй грамотаэз 1999, 2009, 2010 годдэзö. 2010 годö сетiсö званне «Почетный гражданин муниципального образования «Городской округ-город Кудымкар». Наградаэс да отличие знаккез вöлiсö будденнезöн. Сiйö уважайтiсö коллегаэз да любитiсö пациенттэз сы понда, кыдз сiя относитчис йöз дынö. Сiя олiс любимöй уджöн, вермис гортсис кöть кытшöм погоддяö мунны удж вылö, пессьыны шогалiсьыс олан понда сымда, мымда корö ситуация, а не бюрократическöй график.
Не только вына характер да стальнöй терпенне отсалiсö Алексей Ивановичлö быдлунся корöммезын. Сылöн надежнöй тылöн вöлi Нина Константиновна, роч кыв да литература сьöртi велöтiсь. Öтлаын нiя мунiсö кузь олан, торйöтiсö бурсö и умöльсö.
