1/1

Сани

Николай Шестаков, МАММ / МДФ. russiainphoto.ru.

1939 годö Коми-Пермяцкöй окружнöй исполнительнöй комитетлöн Президиум тшöктö аркмöтны Коми-Пермяцкöй сьылан да йöктан ансамбль. Сэтшöм инициативаыс шогмис аскадö, уськöтны кö тöдвылö Кудымкарын издательство осьтöм (1930), национальнöй студия основа вылын театрлiсь уджсö пондöтöм (1935), коми-пермяцкöй алфавитлiсь неважынся оформитöм (1938). Ансамбльыс олiс недыр. 20 год бöртi, тылын сьöкыт будденнез да войнабöрся годдэз мунöм бöрын коллективыс вöлi паськöтöм. Но быдöс эта кадö, кöр ансамбльыс вöлi, сылöн юралiссес, сьылiссес, йöктiссес да музыканттэс смелöя пессисö быдöс сьöкыткöт, мый сувтiс ны туй вылö. Мийö корам уськöтны тöдвылö дзир кынымöкö ны коласiсь да донтны вынсö отирыслiсь, кöдна пессисö творчество возможность понда.

1944-1945 годдэз. «Вöлiсö лöсьöтöмась 7 виль концерт: кык натодиль лöсьöтöм концерт национальнöй программаöн, кык тематическöй концерт, öтiк роч народнöй сьылан да йöктан концерт, украинскöй сьылан да йöктан да челядьлö концерт. 1945 годö артисттэз уджалiсö концерт вылын, кöда вöлi посвятитöм композитор П. И. Чайковскийлö, готовитiсö кык картина «Евгений Онегинiсь».

1949 год. « Программаыс… строитсьö материал вылын, кöда лоö случайнöйöн, только бы произведеннеэс соответствуйтiсö идеологиялö да   вöлiсö интереснöйöсь музыка ладорсянь… Мукöдкоста бöрйöм да лöсьöтöм произведеннеэс эз сувтöтчö, а причинаöн вöлi музыкальнöй сопровожденне баянистлöн …, кöдалöн эз вöв специальнöй музыкальнöй образованне (самоучка) да и адззис умöля (альбинос). Этасянь сопровожденнеыс эз вöв, кыдз, например, «Свадьба-фантазия» Даргомыжскйлöн, ария «Снегурочка» Римскöй-Корсаковлöн. Но вöлiсö и бур моменттэз… Сiя бура аккомпанируйтiс «Клевета» Россинилiсь, «Попутная» Глинкалiсь».

1952 год: «18 мортiсь оланiныс эм дзир 5 мортлöн… Куим морт: баянист Чечулин, актрисаэз Гурина У. Я., Сучкова А. С. нуöтöны кочевöй олан: талун – театрын, ашын – ерттэз дын».

1957 год. «Ансамбльлöн пырся проблемаэз транспортöн. Вöлi автомашина ГАЗ-51, кытчö тöрисö не унажык 20 мортся, кöр творческöй коллективыс сулалiс 30 мортiсь, эз тырмы места багаж понда. Тöвнас сы вылын ветлыны совсем эз туй. Öтiк сезонö эз вермö ветлыны 20-ись. Вöлiсö случайез, кöр коллективыс ветлiс подöн 20-30 километра ылына, медбы концертсö сетны».

Коллективлöн уджыс эз ло вунöтöм и лоис основаöн виль профессиональнöй ансамбль «Шондiбан» аркмöтöм понда, кöдö талун тöдöны не только Коми-Пермяцкöй округын, но и ылын сы дынсянь. 2017 годö декабрь месяцö творческöй коллектив пондас порйöтны 25- годся юбилей.

Источник:

Виктор Рычков: Коми-Пермяцкий национальный ансамбль песни и пляски: страницы истории (1939-1959 гг.). [Электронный ресурс]. URL: https://permk.wordpress.com/2013/09/26/vvr_shondiban-1/