1/1

1990 годдэзö быдöс странаись потребительскöй обществоэз кузя вöлi видзöм сокрушительнöй удар, Коми-Пермяцкöй округ эз ло исключеннеöн. Медыджыт öштöмöн лоис 1997 годö Торгово-кооперативнöй училище пöдналöм, кöда 65 год сьöрна уджалiкö лэдзис 11000 специалистöс.

Кöть и вöлi эта умöльыс , но Коми-Пермяцкöй потребительскöй обществоэзлöн союз эз öш. Сьöкыт годдэзö сiйöн руководитiс Российскöй Федерациялöн торговляись Заслуженнöй уджалiсь В. С. Хрулев (1947-2016 гг.). Василий Семенович чужис Сивинскöй районын и быдöс ассис вынсö сетiс Коми-Пермяцкöй округись потребительскöй кооперациялö.

В. С. Хрулев уджлiсь стильсö уважайтiсö коллегаэз, сы достиженнеэз йылiсь бура тöдiсö Перемын. В. К. Романченко, Пермскöй краевöй потребительскöй обществоэз союзлöн председатель, часто баитлiс Василий Семеновичкöт:

«Медбы вежöртны Василий Семеновичлiсь сутьсö, меным колö висьтавны медодз, что Коми-Пермяцкöй округыс некöр эз вöв богат. Сiйöн сылöн олiссес вежöртöны, что потребкооперацияыс ны понда колана, сiя нылö отсöт. Нiя вермасö сетны карчйöрын быдтöм  или вöрын öктöм продукциясö, а шедтöм деньга вылö босьтны, мый нылö колö. Отирыс этö донтöны. Пондыв вöрзьöт талун потребкооперациялiсь магазин, йöзыс сэк жö шумитны пондас: кытчö, ась лоö!

Василий Семенович этö бура вежöртiс. Сiя вöлi настоящöй кооператорöн, а не бизнесменöн. Любитiс повторяйтны сьыланкылiсь кыввез: «Я рожден в Советском Союзе. Сделан я в СССР». И сiя решайтiс уна вопроссэз социальнöй справедливость принциппез вылын и видзис эта постулат вылын быдöс окружнöй потребсоюзлiсь системасö. 90-öй годдэзö, кöр капиталыс пондiс öддьöн содны, этшöм подходыс эз ло модаын. Василий Семенович öддьöн серьезнöя переживайтiс вежсьöммесö. Сiя вовлiс ме дынö… Мийö дыр баитiм. Василий Семенович пыр повторяйтiс: «Мыйлö жö жугдыны. Буржык керны мыйкö вильö». Эта позиция понда сiйö уважайтiсö и Москваын Центросоюзын, и миян Крайпотребсоюзын».

2007 годö Василий Семенович Хрулев лоис «За заслуги перед Отечеством II степени» орденлöн медальöн, кöдöн награждайтны Российскöй Федерацияись олiссезöс страна понда конкретнöй да полезнöй уджжез понда, кавалерöн.