1/1

Прилавок кооперативного магазина в войну.

Потребительскöй кооперация – Коми-Пермяцкöй округись öнняся пищевöй промышленностьлöн зыбка. Эта годö организацияыслö тырис 145 год. Медодзза потребительскöй кооперативлöн чужан местаöн лоö Кува посад.

Потребительскöй обществоэзлöн окружнöй союз вöлi аркмöтöм 1929 годö февраль месяцö и получитiс Кудымкарын ассис пырся прописка. Правленнелöн медодзза председательöн лоис Андрей Николаевич Саутин (1898-1937 гг.), - чужис Юсьва посадын, Гражданскöй войналöн участник. Сiя кончитiс Оханскöй реальнöй училище и 1923 годсянь пондiс уджавны потребкооперация системаын. 1929 годöдз Андрей Николаевич вöлi Юсьвинскöй потребительскöй обществолöн юралiсьöн, 1932-сянь 1936 годöдз вöлi потребительскöй обществоэзiсь Коми-Пермяцкöй окружнöй союзiсь заготовительнöй конторалöн директорöн. 1937 годö А. Н. Саутин вöлi арестуйтöм и вийöм. Сылöн нимыс гижöм чугуннöй плита вылын, кöда эм 30-50-й годдэзся политическöй репрессияэз жерваэзлö Мемориальнöй комплекс вылын (г. Екатеринбург).

Окружкомсö аркмöтiкö вöлiсö 91 магазин, а 1941 годöдз нылöн лыдыс содiс 2,5 – ись. Этö вöлi джыныс Коми-Пермяцкöй национальнöй округись быдöс торговöй сетьлöн. Унажыксö магазиннэз уджалiсö сельскöй местностьын, но 1931 годö Кудымкарын кооператоррез строитiсö универмаг да столовöй-магазинлiсь кыкэтажа зданне.

Медважнöй проблемаöн округись потребкооперация системалöн зоралöмын вöлi сiя, что эз вöлö кадррез. 1932 годö Кудымкарын оссьö Кудымкарскöй кооперативнöй училище, кöдалöн выпускниккес вöлiсö товароведдэзöн, продавеццезöн, поваррезöн да пекаррезöн.

Великöй Отечественнöй война годдэзö Окружнöй потребкооперация пантасис зэв ыджыт ськыттэзкöт. Населеннелöн босьтасян спросыс чинiс, и этасянь 55 % магазин да ларек пöднассисö. Но активнöя мунiс закупочнöй удж, кöда и отсалiс отирлö овны эна сьöкыт условиеэзын. Дзир 1942 годö населеннелiсь вöлi босьтöм 250 тонна картов, 100 тонна карч, 19 тонна кöс тшак, 15 тонна туримоль да пуягд, 26 тонна öмидз (свежöйнас). Столовöйез, хлебопекарняэз, учöт перерабатывающöй предприятиеэз лэдзисö сэтшöм колана эна годдэзö сеян продукттэз.

Кадсö война бöрсянь 90-й годдэзöдз позьö лыддьыны Окружкомлöн золотöй кадöн. Кудымкарскöй плодоовощнöй комбинат лэдзис сола капуста, сола огуреццез, маринованнöй томаттэз, готовитiсö карчись солянка, ягöдiсь быдкодь вареннеэз да джеммез. 1987 годö продукциялöн ассортиментыс содiс. Предприятиеыс босьтiс öнняся югославскöй универсальнöй заготовительнöй перерабатывающöй комплекс, мый сетiс возможность лэдзны полукопченöй колбаса, кöдö бура босьтiсö. Кудымкарскöй вурсян цех лэдзис курткаэз, телогрейкаэз, удж понда да челядь понда хлопокись костюммез, платьеэз, халаттэз, стяжитöм одеялоэз да кеписсез.

Талун Окружнöй потребкооперация составö пырö 192 вузасян предприятие, 98 % кöдалöн уджалöны сельскöй местностьын, 25 предприятие общественнöй питаннелöн и 16 хлебопекарня,кöдна эмöсь Коми-Пермяцкöй округлöн десяток населеннöй пунктын.