Активнöй горожана йылiсь
Ноябрь 20 лунö Коми-Пермяцкöй политехническöй колледжись преподаватель Наталья Андреевна Тарасова, лоис победительöн номинацияын «Ведущий за собой» «Лучший куратор» (класснöй руководитель) - 2017 профессиональнöй мастерстволöн Межрегиональнöй конкурс вылын Приволжскöй федеральнöй округлöн профессиональнöй образовательнöй организацияэз коласын. Конкурсыс чулалiс Ижевскын. Сэтöн участвуйтiсö велöтiссез Чувашскöй да Удмуртскöй республикаэзiсь, Башкортостанiсь, Марий-Элiсь, Мордовияись, Татарстанiсь, Кировскöй, Нижегородскöй, Самарскöй, Саратовскöй, Ульяновскöй областтезiсь да Пермскöй крайись.
Ноябрь 23 лунö чулалiс этнокультурнöй проекттэз конкурслiсь итоггесö керöм. Сiя чулöтсьö Коми-Пермяцкöй округлöн делоэз сьöртi Министерствоöн кык годö öтпырись. Гранттэзлöн быдсöн суммаыс 400 тысяча руб.
Патриотическöй воспитаннелöн центр «Патриот» керис аудиокнига «Олiсö да вöлiсö» («Жили да были»), кöдаö пырисö 10 роч нороднöй да авторскöй сказка, кöдна вуджöтöмась коми-пермяцкöй кыв вылö. Учöт челядь понда тексттэсö лыддьöтiсö Коми-Пермяцкöй национальнöй драматическöй театрись артисттэз. Аудиокнигаыс октябрь пондöтчöмын меститöм Вконтактеын, и уже талун сiйö кывзiсö 10 тысячася унажык морт.
«Иньвенскöй край» газеталöн редакция реализуйтiс проект «Öтiк му-öтiк кыв» (Одна земля – один язык), кöдалöн результатöн лоис сборник 1000 экземпляра тиражöн. Сэтчö пырисö öнняся коми, коми-пермяцкöй, коми-язьвинскöй авторрезлöн кывбуррез, а сiдзжö зюздинскöй коми-пермяккезлöн частушкаэз. Сборникыс вöлi иньдöтöм Коми-Пермяцкöй округись сельскöй да школьнöй библиотекаэзö, Коми Республикаö, Пермскöй крайись Красновишерскöй районö да Кировскöй областись Афанасьевскöй районö.
Кувинскöй загороднöй лагерь керис «Я-коми-пермяк» этнографическöй тропа. Лагерь территория вылын лоисö пуись ыджыт нинкммез, «Пера да Зарань» скульптура, округлöн карта да мöдiк «этнокультурнöй» арт-объект. Керöм и интерактивнöй экскурсия, кöда посвятитöм коми-пермяцкöй легендаэзiсь геройезлö.
Челядь сад № 27 «Колокольчик» (г. Кудымкар) реализуйтiс проект «Коми-пермяцкий этнокультурный календарь». Сэтчö пыртöмöсь сведеннеэз вежалуннэз, коми-пермяккезлöн обычайез да обряддэз йылiсь, гора нима земляккез йылiсь информация, коми-пермяцкöй поэттэзлöн кывбуррез, челядьлöн серпассэз да уна мый мöдiк. Электроннöй видын сiя сiдзжö доступнöй учрежденнелöн сайт вылын.
Коми-пермяцкöй кыв да культура радейтiссезлöн общество «Югöр» организуйтiс и чулöтiс конкурс «Гора кай» (Птица певчая), кöдаын участвуйтiсö коми-пермяцкöй кыв вылын виль сьыланкыввезлöн да челядь понда музыкальнöй орсаннэзлöн авторрез. Буржыккес ны коласiсь октябрь 18 лунö горалiсö конкурслöн гала-концерт вылын. Конкурс вылö быдöс иньдöтöм музыкальнöй произведеннеэс гижöмась диск вылö и лэдзöмась брошюраöн, кöда поступитiс Коми-Пермяцкöй округись образованне да культура организацияэзö.
Ноябрь 23 лунö автономнöй некоммерческöй организация «Сельский социальный проект» да творческöй мастерскöй «Горт» судзöтiсö президентскöй грант и пондöтiсö реализуйтны этно-музыкальнöй проект «Виль шы» (Новый звук). Творческöй коллектив В. Мехоношина юралöм увтын тыртiс важся мечта – öнняся коми-пермяцкöй фольклорнöй музыка зорöтöм, сэтöн жö этно-электроника, фолк-джаз, нью-эйдж-музыка коми-пермяцкöй кыв вылын материал исползуйтöмöн.
Ноябрь 24 лунö Гатаулиннэзлöн семья участвуйтiс Всероссийскöй конкурслöн «Семья года – 2017» торжественнöй церемонияын победителлезöс наградитöмын. Кудымкарсалöн ыджыт и дружнöй семьяын сизим морт: мам, ай, нель ныв да зон. Нiя участвуйтiсö соревнованнеын «Многодетная семья» номинацияын.
«Мийö эгö видзчисьö этшшöм бытшöм событиесö миян оланын. Миян челядьлöн мечта-адззывны Россиялiсь Президентöс Владимир Владимирович Путинöс,- висьталiс семьялöн глава Вадим Гатаулин «Парма» газетаись корреспондентлö.-Эм неыджыт проблема сыын, кинкöт и кинлö кольны ассиным подсобнöй хозяйствосö: мöссэз, порссез, курöггез, козаэз да эшö уна мöдiк животнöй, но мийö сiйö решитам».
Всероссийскöй конкурслöн «Семья года – 2017» итоггез сьöртi лэдзöм книга, кытöн висьтассьö проектлöн участниккез йылiсь.
