Быдöс я ме кери талун одзланься луннэзлöн успеххез понда?
Коми-Пермяцкöй округын сотняэз километра вылö нюжалöм тшöк гырись вöр – коми-пермяккез культуралöн неянсöтана тор, строгановскöй управленнеццез службалöн предмет, советскöй кадö округ зоралöмлöн основа. 1920 годдэзö пондöтчö союзнöй республикаэзлiсь природнöй богатствоэсö используйтöм. Кудымкар лоö вöра крайлöн центрöн, кытчö локтöны специалисттэз. Профессионаллэсö корöмыс сетö польза быд уджлö, но отрасльлöн увереннöй зоралöм понда кадровöй ресурсыс колö асланым.
Сентябрь 1929 годö Кудымкарын оссьö Леснöй техникум. Вöрзаптан предприятиеэз отсöтöн вöлi строитöмась общежитиеэз, преподавателлез понда керкуэз, физкультурнöй городок да велöтчан корпус. Оланыс техникумас пизис радöн и шогöн, курьезнöй случайезöн да событиеэзöн, кöдна йылiсь эз баитö. Недыр кежö техникумыс вöлi вуджöтöм Сарапул городö, но война вотöдз жö бертiс бöр.
Арнас 1941 годö сiя лоис гортöн велöтчиссез понда Тихвинскöй лесотехническöй техникумись, кöда война коста вöлi эвакуируйтöм. Кынымкö месяц бöртi ны дынö содiсö Воронежскöй областись Борисоглебск городiсь студенттэз. Эта сьöкыт велöтчан годö директорлöн вежись обратитчис велöтчиссез дынö сэтшöм кыввезöн:
«Быд студент, Профкомлöн, ВЛКСМ комитетлöн член, преподавателлез ассиныс быд уджалан лунсö кончайтiкö должен проверитны асьсö – быдöс я ме кери талун одзланься луннэзлöн успеххез понда, и не сувтöтны уджсö сэтчöдз, кытчöдз оз ло керöм медбöрья заданне, кöда сувтöтöм талун кежö.
Северо-западнöй фронтлöн боеццез обратитчисö Молотовскöй областись быдöс уджалiссез дынö призывöн примитны нылiсь корöмсö соревнованне вылö и уджись успеххезöн докажитны родиналö служитöмсö. Кудымкарскööй техникумлöн коллективыс, II велöтчан полугодиеö пырикö должен велöтчöмын да обороннöй уджын вылын показателлезöн шедтыны медодзза места эта соревнованнеын.
Упорнöй удж понда, ерттэз!»
Студенттэз, преподавателлез да техникумись сотрудниккез мунiсö фронт вылö, мукöдыс ны коласiсь эз бертö бöр. Уна эвакуированнöйез война бöрын кольччисö городын и пыртiсö ассиныс пай леснöй техникумыс сувтöмö, кöдатöг оз позь представитны öнняся Кудымкарсö.
