1/1

Пермяцко-русскöй и русско-пермяцкöй словарь Николай Абрамович Рогов редакция увтын

ГКБУК «М. П. Лихачев нима Коми-Пермяцкöй центральнöй национальнöй библиотека»

Кудымкар коми-пермяккезлöн дзир öтiк город статуссянь сiдзжö вермас справедливöя шусьыны быдса народдэз тöдöммезлöн хранилищеöн. М. П. Лихачев нима Коми-Пермяцкöй центральнöй национальнöй библиотекаын хранитчöны 4128 экземляр книга коми-пермяцкöй кыв вылын. Мукöдыслö ны коласiсь и годыс эшö лэдзöмсянь абу, но эмöсь фонддэзын книгаэз-императорскöй Россиялöн современниккез. Öтлаын библиотекалöн краеведческöй отделiсь уджалiссезкöт мийö лöсьöтiм ТОП-5 коми-пермяцкöй книгаэзлiсь, кöдна берегитöны национальнöй культура.

Медваж книга, кöда хранитчö фондын,-«Пермяцко-русскöй и русско-пермяцкöй словарь" – вöлi лэдзöм Санкт-Петербургын 1869 годö. Почти 13000 кыв öктiс и вуджöтiс Строгановвезлöн Иньвенскöй дачаöн управляющöй Николай Абрамович Рогов. Современниккез вылына донтiсö сылiсь уджсö коми-пермяцкöй отирлiсь историясö велöтöм да мыччалöм понда.

Библиотекалöн фонддэз пытшкын- öтiк медодзза букваррез коласiсь, кöда лэдзöм коми-пермяцкöй кыв вылын XX век конецын. Велöтiсь и священнослужитель Ермолай Евдокимович Попов лэдзис букварь «Выддем пермяк понда» (Чтение для коми-пермяков). Книгаыс локтiс миян дынöдз, сiдз кыдз вöлi лэдзöм приложеннеöн «Адрес-календарь Пермской епархии на 1894 год и справочная книжка для духовенства» сборник дынö.

Округын национальнöй школаэз аркмöтiкö, велöтiссез вуджöтiсö учебниккез роч кыв вылiсь коми-пермяцкöй кыв вылö. Öтiк, медпöрись велöтчан изданнеэз коласiсь, кöдна эмöсь библиотекаын, гижöм 1925 годö. «Выддисьны вевöтчан задачник». (Задачник) А. В. Ланков авторство увтын вöлi публикуйтöм пермяцкöй наречиелöн молодцовскöй алфавит вылын. Колö висьтавны, что сiя кадö национальнöй кыв вылын литератураыс печатайтчис Москваын.

Коми-Пермяцкöй книжнöй издательстволöн дебютöн вöлi 1930 годö лэдзöм «Том ударник» (Молодой ударник) журнал. Сы страницаэз вылын первуись вöлiсö публикуйтöмась коми-пермяцкöй гижиссезлöн, коми-пермяцкöй литературалöн основоположниккезлöн: Андрей Никифорович Зубовлöн да Михаил Павлович Лихачевлöн произведеннеэз.

Библиотека одзлань понда берегитö öнняся изданнеэз, сiдз кыдз кынымкö год бöртi нiя лоасö ценатöм фолианттэзöн. Фондовöй стеллажжез вылын 2016 годö мыччисисö «Коми-пермяцкая классика» серияись книгаэз, кöдна лэдзöмась ГКБУК «Коми-Пермяцкöй этнокультурнöй центрöн». «Избранное» заголовок увтын публикуйтöмась литературнöй произведеннеэз гижиссезлöн: М. Д. Вавилинлöн, С. А. Можаевлöн и И. А. Мининлöн.