1/1

Гнутье осей для колес под прессами в артели «Красный молот», 1948 г.

Коми-Пермяцкий окружной государственный архив (Ф. 265).

Учöт бизнеслöн историяыс пондöтчис Кудымкарын не тöн и даже не удерлун. Сiя вужжезнас мунö важся кадö, сы йылiсь гижны огö пондö. Висьтасям кустарно-промысловöй кооперативвез удж йылiсь или, кыдз нiйö эшö шуисö, артеллез йылiсь.

1927-сянь 1956 годöдз нiя паськыта олiсö и быднеж видзсисö государствоöн. Артеллезлöн вöлiсö налоговöй льготаэз, вöлi право аслыныс сувтöтны ценаэз асланыс продукция вылö, но не вылынжык государственнöйся 10-13 % вылö. Эта сектор рамкаэзын действуйтiс аскодь пенсионнöй система. Артеллезлöн вöлi право сетны аслас членнэзлö ссудаэз пода, инструмент да оборудованне, босьтöм вылö, оланiн строитöм вылö.

1953 год кежö СССРын вöлi 114000 быдкодь направленнеа артель, кöдаын уджалiсö 2 миллионся унажык морт. Нiя керисö 6 % СССР промышленностьлiсь валовöй продукциясö. Артеллез керисö 40 % мебель, 70 % металлическöй посуда, куимöт торся унажык быдöс трикотажлiсь, почти быдöс челядь понда орсаннэз. Уджалан законодательство надежнöя дорйис энö предприятиеэзсö чиновниккез произволсянь.

Эна годдэзö Кудымкарын уджалiсö дасся унажык быдкодь артель, кöдна лэдзисö быдкодь продукция. Улынжык сетöмась даннöйез эта типлöн вит медыджыт городскöй предприятие удж йылiсь.

Великöй Отечественнöй войналöн медодзза куим годас дзир «Красный подеревщик» артель керис 50000 парася унажык лыжаэз, а «Красный молот» артель сетiс фронтлö 800-ся унажык параконнöй военнöй повозка. «Пролетарка» артельын велалiсö керны постнöй ви.

Войнабöрся годдэзö эна артеллес нуöтiсö одзлань ассиныс успешнöй уджнысö. Öтлаын ныкöт «Имени 23 годовщины Октября» инвалиддэзлöн артель öтлаын «3-я пятилетка» артелькöт тыртiс заказзэз изделиеэз вурöм сьöртi, особенно дамскöй пальтоэз да костюммез, населеннелö ремонтируйтiсö кöмкöт, электроприборрез, часыэз, музыкальнöй инструменттэз.

Но 1956 годö Н. С. Хрущев волевöй решеннеöн ликвидируйтiс народнöй хозяйстволiсь этö ыджыт секторсö. Сiя пондiс лэбтiсьны дзир 30 год бöртi учöт предпринимательство формаын.

Кывчукöр

Артель – этö отирлöн добровольнöй чукöр öтласа  или мöдк коллективнöй удж понда, частожыксö öтласа доходдэзын да öтласа ответственностьын участвуйтöмöн круговöй порука основа вылын. Если артель занимайтчис готовöй продукциясö вузалöмöн, то ся шусис кооператив.