1/1

1929 год позьö лыддьыны Коми-Пермяцкöй округын йöвлiсь промышленнöй заптöм аркмöтан годöн. Поносова  деревняын (1) вöлi осьтöм сыркеран завод.  Сылöн мощностьыс вöлi неыджыт – сменанас 100 тонна йöв. 10 год бöртi эта заводыс пыр кеж гижсис Кудымкарись Юрино поселокö. Эта кад кежö Коми-Пермяцкöй национальнöй округын уджалiс ни 8 викеран завод и 42 сепараторнöй отделенне, унажыксö кöдна коласiсь вöлiсö öнняся Кудымкарскöй да Юсьвинскöй районнэзын. Великöй Отечественнöй война годдэзö предприятиеэз лэдзисö 1401,5 тонна йöв, 88,0 тонна сыр, 121,8 тонна казеин и 168,9 тонна мороженöй. Сравнитны кö 1942 годкöт , 1942 годын мороженöйлöн керöмыс лэбис 30-ись и лоис 87,6 тонна годö.

Кудымкарскöй сырзаводлöн реконструкция пондöтчис 1968 годö. Сiя сетiс возможность 2,5 раз содтыны йöвлiсь заптöмсö да пондöтны продукция лэдзöм, кöда лоис привычнöйöн öнняся отир понда. 1982 годö важ оборудованне вежöм бöрын предприятиеыс петiс заптан мощность вылö 40 тоннöдз йöв сменаö и сетiс возможность лэдзны 4 тоннаöдз сметана, 600 кг. рись,  2 тонна кефир, 10 тонна пастеризуйтöм йöв, 4 тонна чöскыт сливочнöй ви сменаö. Бурликтан 1990-öй годдэзö Кудымкарскöй йöвзавод не öтпыр вежлiс ассис юридическöй статуссö. Дзир декабрь 29 лунö 1997 годö сiя получитiс öнняся юридическöй статус ОАО «Молоко».

Талун ОАО «Молоко» оз ло йöв да йöв продукция лэдзöмын субъектöн (2). Кыдз жö сiдз? Предприятиеыс 20 год активнöя уджалö, а ассис продукциясö оз вузав. Мый жö сэк магазиннэзын босьтöны кудымкарса, округын да Пермскöй крайись мöдiк городдэзын олiссез? Ответыс эта юасьöм вылö не совсем обычнöй. 2007 годö вит сельхозпредприятие: СХПК «Россия», «Киров нима колхоз» СПК, «Колхоз Урал» СПК Кудымкарскöй районiсь и Дзержинскöй нима колхоз, «Дружба» СПК Юсьвинскöй районiсь аркмöтiсö сельскохозяйственнöй потребительскöй сбытовöй кооператив «Молоко Пармы». Организациялöн сэтшöм формаыс сетiс учредителлезлö не лишь определяйтны ценасö сетöм йöв вылö, но и вузавны готовöй продукциясö. ОАО «Молоко» лоис предприятиеöн, кöда пондiс уджавны босьтöм йöв вылын. Кöр Коми-Пермяцкöй округись предпринимателлезлöн инициатива йылiсь тöдiс Пермскöй крайись сельскöй хозяйстволöн министр Е. Е. Гилязова, то висьталiс эта затеялiсь чожа падмöмсö, определитiс сроксö – не унажык джын годся. Елена Ефимовна важын ни оз уджав сельскöй хозяйствоас, а  «Молоко Пармы» отмечайтö эта годö ассис дасгодся юбилей.

Ордчöн Пермскöй крайись ыджыт йöвзаводдэзкöт СХПК «Молоко Пармылöн» йöв заптан объемыс лоö скромнöйöн: 20-сянь 40 тоннаöдз суткиас. Лэдзöм продукциялöн качествоыс пыртö сiйö предприятиеэзлöн неыджыт списокö, кöдна лэдзöны натуральнöй йöв продукттэз, кöдна быдсöн соответствуйтöны советскöй да öнняся ГОСТ корöммезлö. Если бы СХПК «Молоко Пармы» да ОАО «Молоко» коллективвез удж йылiсь тöдiс Александр Васильевич Чичкин, тöдса российскöй предприниматель, кöда олiс XX век пондöтчöмын, сiя иньдöтiс бы нылö сэтшöм утвержденне: «Поэттэз поэттэзöн, но эд и ви бочкаöн, и сыр юрöн, и чöскыт йöв бутылкаöн позьö öтмоза славитны ассиным Отечество, служитны чужан му зоралöмлö».

öнi пырö Кудымкарскöй муниципальнöй районiсь Егвинскöй сельскöй поселеннеö.

Источник: Пермскöй крайлöн границаэзын йöв да йöв продукция рынок вылын конкурентнöй средалiсь состояннесö донтöм сьöртi Федеральнöй антимонопольнöй службаись Пермскöй управленнелöн аналитическöй записка.