1/1

Советскöй Союз мировöй театральнöй сценаын вöлi медодзын. Искусство, кöда вöлi паськыта тöдса эшö царскöй Россияын, одзлань зорамис 1920 –öй годдэзö. Кудымкарын эта кадö уджалiс ни драматическöй кружок, кöдö аркмöтiс Мария Александровна Тютикова, лесничöй Василий Александрович Тютиковлöн инь. «Сiя ачыс босьтавлiс дöра и вурлiс костюммез, Кудымкор посадiсь олiссесö велöтiс актерскöй мастерствоö, сувтöтлiс спектакллез». (1). 1918 годö Мария Александровналiсь пондöтöмсö босьтiс Евстолия Ивановна Субботина, художник Петр Иванович Субботин-Пермяклöн инь. Öтлаын нiя лöсьöтiсö Кудымкарскöй профессиональнöй театр понда основасö.

1930-öй годдэзö аслас мамлiсь пондöтöмсö одзлань нуöтiс Ия Петровна Субботина. Öтлаын жöникыскöт, режиссер Е. И. Сикевскийкöт, сiя осьтiс национальнöй драматическöй студия «Театр колхозной молодежи» (ТКОМ). Том таланттэз пондасö велöтчыны театральнöй мастерствоö актеррез дын Свердловскöй театральнöй труппаись, кöда 1930 годö уральскöй столицаись локтiс Кудымкарö. Вит год бöртi свердловчана лоасö вуджöтöмöсь Перемö. Сiйöн Коми-Пермяцкöй округын театральнöй уджлiсь зоралöмсö босьтасö асланыс киэзö выпускниккез оддзася ТКОМлöн, кöда 1935 годö лоис «М. Горький нима Коми-Пермяцкöй драматическöй театрöн». Студиялöн дебютанттэзöн и одзланься сценалöн звездаэзöн вöлiсö А. Г. Котельникова, Н. П. Канюкова, Н. П. Кивилева и мöдiккез.

Сэксянь чулалiс неетша кад. Театр аркмис куим годöн одзжык городся, и, кыдз пöрисьжык вон, сiя пыр отсалiс и вöлi ордчöн. Режиссеррез, актеррез, декораторрез, композиторрез керöны не только талантливöй спектакллез, но и Кудымкарлiсь пространствосö. Этö бытшöм традициясö театр видзö öнöдз. Но уськöтам тöдвылö национальнöй студиялiсь выпускниккесö да сценаись уджалiссесö, кöднатöг Кудымкарыс вöлi бы мöдiк:

-Анна Георгиевна Котельникова – режиссеррезлöн муза, публикалöн любимица, Кудымкарсö славитiс и Коми-Пермяцкöй округ сайын. Сыöн аркмöтöм театральнöй образзэз босьтлiсö сценаэсö столицаись да Советскöй Союзлöн мöдiк городдэзiсь;

-Национальнöй театральнöй студиялöн выпускник, «Синва» спектакль дынö музыкалöн автор, медодзза профессиональнöй коми-пермяцкöй композитор Александр Иванович Клещин, велöтiс Кудымкарись городскöй музыкальнöй школаын и юралiс сьылан да йöктан профессиональнöй Коми-Пермяцкöй ансамбльöн;

-Дмитрий Сергеевич Евстигнеев вöлi Кудымкарлöн медодзза герб аркмöтiсьöн; сы трудовöй книжкаын вöлi дзир öтiiк гижöм – «Коми-Пермяцкöй драматическöй театр». Сэтчин сiя уджалiс пыр, пондöтiс бутафор должностьсянь и кончитiс карьерасö главнöй художникöн.

Источниккез:

1. Истомина Е. Разбитая интеллигенция / Е. Истомина // Город Кудым Оша. Кудымкару исполняется 75 лет. Кунгур: Печатный дом, 2013.