Кудымкарын любитöны и кужöны лэдзны фотоальбоммез. Миян киэзö лöсялiсö кыка ны коласiсь «Кудымкар – город Кудым-Оша» (2007 г.) и «Менам му_Парма» (2014 г.). Изданнеэзö пыртöмась уджжез фотограффезлöн, кöдна висьтасьöны гöгöр мирлiсь басöк йылiсь. Миянлiсь вниманненымöс видзöны уджжез Вадим Павлович Гребневлöн.

Первуись сылöн фотографияэс вöлiсö публикуйтöмась «Кудымкар-город Кудым-Оша» изданнеын. Тöдса фотограф  Юрий Сыстеров висьталiс ны йылiсь: «Сылöн уджжес, кöдна вылын мыччалöмась лов öзтан пейзажжез, дивуйтöны не только асланыс ассямаöн да эстетичностьöн, но и вылын профессионализмöн. Не быдыс вермас керны сэтшöм снимоккез».

2013 годö В. П. Гребневлöн персональнöй выставка «Природа и свет» оссис Юсьваын. Местнöй газетаын вöлi меститöм рецензия: «Организаторрез мненне сьöртi, выставкаыс вермас формируйтны природа дынö гуманнöй отношенне, корны отирлiсь думаэз асланыс отношенне йылiсь гöгöр природа дынö, вились видзöтны олан доннэз. Вадим Павлович кужö примитны природасö эмоциональнöя, вермö кутны аскодь моменттэз шондi или тöлiсь пырöмлiсь».

Вадим Павловичлöн профессияыс, кажитчö, ылын художественнöй фотографиясянь. Вадим Павлович кончитiс Кудымкарскöй медицинскöй училище, сыбöрын Пермскöй государственнöй медицинскöй институт. 2017 годö тырис 40 год, кыдз сiя уджалö окружнöй поликлиникаын офтальмологöн. Высшöй категорияа врач, «Здравоохраненнелöн отличник». Одноклассникиын Вадим Павлович группаын пыртöмöсь бытшöм фотоальбоммез, öтiк ны коласiсь шусьö «Кудымкар-моя любовь».