1/1

Кудымкарскöй сельхозтехникумлöн важ зданне. 1947 год.

Коми-Пермяцкöй окружнöй государственнöй архив (Ф. 265).

Талун Кудымкарсö позьö смелöя шуны студенческöй городöн. Сылöн шöрöт профессиональнöй образовательнöй организацияэс лоöны Пермскöй крайын не дзир важсяэзöн, но и успешнöя зорамöны öння условиеэзын. Эта йылiсь бытшöма висьталö 2017 годся справочник, кöда лöсьöтöм Пермскöй крайлöн образованне да наука сьöртi Министерствоöн.

Кудымкарскöй педагогическöй колледж (1927) – Коми-Пермяцкöй округын медодзза профессиональнöй велöтчан заведенне. 90 год сьöрна лöсьöтiс 11000-ся унажык дошкольнöй учрежденнеэзiсь воспитательöс да школаэзiсь велöтiсьöс. Сы выпускниккез коласын 20 наукаэзлöн кандидаттэз да докторрез. Талун лэдзö специалисттэсö 5 направленне сьöртi (дошкольнöй возрастся понда воспитатель, начальнöй классэзын велöтiсь, адаптивнöй физкультура да спорт сьöртi велöтiсь и мöдiккез). Дзир медбöрья годдэзö колледжись студенттэз лоисö победителлезöн вылын международнöй да межрегиональнöй конкурссэзын да форуммезын.

Кудымкарскöй лесотехническöй техникум (1929 год)  эта кадсянь лэдзис 10000 специалистся унажык. Талун сiя готовитö кадрресö 7 специальность сьöртi (автомобильнöй туйез строитöм сьöртi техник, вöр и вöр да парк хозяйствоись специалист, вöрзаптöмын техник-технолог и мöдiккез). Техникумлöн партнеррез – финскöй фирма «Ponsse», «Подъемные машины» (Великие Луки), «Гидросервис» (г. Пермь) да мöдiк компанияэз. Техникумись преподавателлез да студенттэз – призеррез и победителлез общероссийскöй фестиваллезлöн да конкурссэзлöн.

Коми-Пермяцкöй агротехническöй техникум (1930 год) – талун велöтö специалисттэсö 5 специальность сьöртi (агроном, ветеринарнöй фельдшер, техник-механик да мöдiккез), сылöн партнеррез – Пермскöй крайись агропромышленнöй комплекслöн одзын мунан предприятиеэз. 2016 годö 85 % выпускник пондöтiс ассис уджсö получитöм специальность сьöртi. Техникумлöн Юсьвинскöй филиал готовитö выпускниккесö 7 уджалан специальность сьöртi (мошвöдитiсь, тракторист, садовник да мöдiккез).

Кудымкарскöй медицинскöй училище (1932 год) – уджалöм коста лэдзис 11056 выпускникöс. 2017 годö порйöтiс ассис 85 год. Сылöн партнеррезöн лоöны здравоохраненнелöн организацияэз не только Коми-Пермяцкöй округись, но и Карагайскöй да Верещагинскöй районнэзiсь. Готовитö специалисттэзöс фельдшер да медицинская сестра (медицинский брат) специальносттез сьöртi. Училищеись выпускниккез не только успешнöя выступайтöны быдкодь всероссийскöй да межрегиональнöй олимпиадаэз вылын, но и колöны удж рынок вылын Пермскöй крайын и мöдiк регионнэзын.

Коми-Пермяцкöй торговля да сервис техникум (1950 год) – готовитö специалисттэзöс 6 специальность сьöртi (повар, кондитер, пекарь, общественнöй питаннелöн техник-технолог и мöдiккез), предприятиеэз-партнеррез коласын – пекарняэз, Кудымкарскöй общественнöй питаннелöн предприятиеэз, Коми-Пермяцкöй округись потребкооперациялöн предприятиеэз. Студенттэз успешнöя выступайтöны быдкодь олимпиадаэз да краевöй уровеня конкурссэз вылын.

Коми-Пермяцкöй политехническöй техникум (1950 год) талун готовитö специалисттэзöс 7 уджалан специальность сьöртi (электросварщик, автомобиллез ремонтируйтöм сьöртi техник, ЧПУ станоккезлöн оператор и мöдiккез), кöдна зэв коланаöсь удж рынок вылын. Техникумлöн партнеррезöн лоöны Кудымкарись предприятиеэз.