Кыдз Виктор Астафьев вовлiс Кудымкарö
Чулалiс 90 год, кыдз Всесоюзнöй коммунистическöй партиялöн съезд вылын вöлi примитöм решенне Советскöй Союз территория вылын коллективизация чулöтöм йылiсь. Деревнялö, кöда вöлi тальöм Гражданскöй войнаöн, неурожайöн да тшыгöн, колiс мунны эшö öтiк испытанне пыр. Эна сьöкыт годдэз йылiсь гижö Василий Васильевич Климов, коми-пермяцкöй поэт и прозаик. Аслас тексттэзын сiя баитö шог, пессьöм, противоречиеэз да надейтчöм йылiсь, кöдна пырйöт мунiсö эна событиеэз дырни олiссез. Мича да сьöлöмви «Кровь и хлеб» висьт вöлi вуджöтöм коми-пермяцкöй кыв вывсянь роч кыв вылö тöдса поэтöн, аслас поколеннелöн шыöн, Виктор Петрович Астафьевöн.
Виктор Петрович öтлаын Николай Константинович Старшиновкöт уджалiс Кудымкарын 1950-öй годдэз конецын, тöвнас. Гижиссез Союзлöн Пермскöй отделеннеöн корöм сьöртi нiя вуджöтiсö коми-пермяцкöй поэттэзлiсь да прозаиккезлiсь произведеннеэсö роч кыв вылö. «Быдса луннэзöн мийö пукалiм пызан сайын вуджöтöммез дорын. Миян дынö пыравлiсö и асьныс авторрес, мукöд произведеннеэсö часто вуджöтлiм ныкöт öтлаын. А рыттэзнас разминка да разрядка понда орслывлiм картыэзöн дуракöн или чулöтлiм кадсö баитöмын»,-уськöтö тöдвылö Николай Константинович.
1959 годö петiс коми-пермяцкöй гижиссезлöн висьттэзöн сборник роч кыв вылын «Зори над Иньвой» ним увтын. Сэтчин вöлi публикуйтöмась Василий Климовлöн висьттэз «Кровь и хлеб» и «Сломанный крест». Астафьевкöт пантасьöм да удж бöрын сiя «вежöртiс, что литератураыс корö авторсянь событиеэсö пыдына вежöртöм»… 1959 годся «Зори над Иньвой» ассяма сборник тiйö вермат лыддьöтны М. П. Лихачев нима Коми-Пермяцкöй центральнöй национальнöй библиотекалöн краеведческöй отделiсь.
Тöдтöм терминнэзлöн кывчукöр
Коллективизация (1927-1933) – учöт единоличнöй крестьянскöй хозяйствоэз öтласа сельскохозяйственнöй предприятиеэзö кооперированнеöн öтлаöтан процесс. «Обобществленнеыс» колö, медбы строитны виль экономика, кöдаын оз ло места частнöй собственность понда. Эта явленнелöн мöдiк ладор – идеология. Государстволöн унажык олiссес – «крестьяна», а не «рабочöйез», кыдз колiс бы лоны развитöй индустриальнöй обществоын, кöда готов социализмсянь коммунизмö чожа вуджöм дынö. Колö вильмоза лöсьöтны быдöс крестьянскöй хозяйствоэсö, нуöтны ныын сплошнöй коллективизация.
Редакция аттеалö Валентина Николаевна Щекинаöс да Екатерина Валерьевна Козловаöс, М. П. Лихачев нима Коми-Пермяцкöй центральнöй национальнöй библиотекалöн краеведческöй отделiсь уджалiссезöс, материаллэсö лöсьöтöм понда.
