1/1

1933 годö Советскöй Союзын пондöтчис мöдiк пятилетка. Коми-Пермяцкöй округись олiссез одзын сувтiс задача модернизируйтны вöра промышленность, кöда эз соответствуйт производстволöн öнняся корöммезлö. Сiйöн Кудымкарö вовлiсö специалисттэз виль технологияэз пыртöм могись. Но, Кудымкарын сувтчылiкö, нiя пантасьлiсö öтiк, но ыджыт проблемакöт – местаэс олöм понда эз вöлö. Этö колана вопроссö решитöм бердö и кутчисö Окружнöй исполнительнöй комитетын.

Öнi колiс недыр кежö ветлыны столицаö, Москваö. Сэтчин 1932 годö чулалö Советтэз керку строитöм понда архитектурнöй проекттэзлöн конкурснöй бöрйöм. Архитекторрез, кöдна уджалiсö Союзын тöдса конструктивизм принциппез сьöртi, эз получитö öтiк приз. Одзлань конструктивистскöй стильын строитöммесö пондасö чорыта критикуйтны, кыдз «вачкисянаöсь сарайез да казармаэз вылö, а не отирлöн гажа керкуэз вылö». 1937 годö архитекторрезлöн Всесоюзнöй съезд вылын конструктивизмлö лоас петкöтöм «кулан приговор».

Бертам Кудымкарö, кытöн 1932-сянь 1934 годöдз мунö зэв колана гостиницалiсь плансö утвердитöм. И кöть советскöй архитектуралöн тенденцияэзын тöдчанаöсь вöлiсö вежсьöммез, гостиница пондас строитсьыны «Альбом рабочих жилищ» чертежжез сьöртi. Альбомын вöлiсö планнэз бараккез, общежитиеэз, гостиницаэз, секционнöй да торья сулалан керкуэз строитöм понда. Принциппез, кöдна сьöртi лöсьöтöм документыс, основывайтчис конструктивизм идеяэз вылын. Гостиницалöн строитöмыс пондöтчис 1934 годö и помассис квать год бöртi. Сiдз Кудымкарын лоис конструктивизм стильын керку, кöр Советскöй Союзын сэтшöммесö важын ни эз строитö.

Война годдэзö эстöн паськöтлiсö госпиталь, а XX векся мöдiк джынын зданнеас уджалiс Окружнöй исполнительнöй комитет. Талун Советтэзлöн керку – 1930 годдэзся советскöй архитектуралöн ассяма памятник, öтiк округын и шоч Пермскöй край понда.