Овлöны отир, кöднö оз туй вежны
1935 годö Кудымкарлöн юго-западнöй окраина вылын пондöтiс ассис уджсö плодово-ягоднöй питомник. Сы аркмöтiсьöн и уна годдэзся вежлытöм директорöн вöлi Иван Федорович Овчинников, Кудымкарлöн почетнöй олiсь, Трудовöй Краснöй Знамя орденлöн кавалер, СССР-ись народнöй хозяйствоись достиженнеэз Выставкалöн неöтпырся участник, Гражданскöй да Великöй Отечественнöй войнаэзлöн участник.
Селекционнöй уджыс вöлi Иван Федоровичлöн олан призваннеöн. Медодзза увлеченне – этö ирга да виргинскöй (гöрд) льöм. 1955 годö «Сад и огород» журналын вöлiсö публикуйтöмöсь сылöн статьяэз энö полезнöй туруннэсö быдтöм йылiсь. Уна йöз интересуйтчис эна етшалö сэк тöдса культураэзöн. Страналöн быд угöлсянь Кудымкарö пондiсö локны заказзэз. И сiдз Кудымкарскöй плодово-ягоднöй питомник иньдiс СССР-ись 114 регионö сымда быдмассэз, мымда бы тырмис, медбы зеленöйсьöтны туйсö Коми-Пермяцкöй округлöн столицасянь Москваöдз.
Мöдiк направленнеöн Иван Федоровичлöн селекционнöй уджын вöлiсö крыжовник да сьöд сэтöр. Сылö удайтчис петкöтны 30 сортся унажык быдкодь вид крыжовниклiсь да 15 сорт сьöд сэтöр. Тулысöн Кудымкарын олiссез вермисö босьтны плодово-ягоднöй питомникись помидоррезлiсь быдтассэз, а гожумöн – зеленöй лук да мöдiк карч.
«Плодопитомник вöлi ыджытся-ыджыт. Кытшöм яблоккез вöлiсö, а ягоднöй культураэз йылiсь и баитны нем! Менам дедö Кривощеков Геннадий Осипович уджалiс сэтчин рядовöй трактористöн. Ме эшö помнита Иван Федоровичсö» - Вконтакте-ись И. Ф. Овчинников йылiсь гижöмсö комментируйтiс Кудымкарись олiсь Андрей Казанцев.
