1/1

Коми-Пермяцкöй национальнöй округ СССР-ын аркмис медодз. Советскöй законодательство сьöртi округгез долженöсь вöлiсö пырны край или область составö. Сiйöн 1921 годö Кудымкарын сувтiс вопрос регионсö бöрйöм йылiсь, кöдалöн границаэс паськалiсö бы Коми-Пермяцкöй округ öтлаöтöмсянь. Совещаннелöн участниккез согласитчисö территориясö Коми-Зырянскöй областькöт (öнi Коми республика) öтлаöтöмкöт.

Октябрь 1924 годö Яков Кукшич Пасютин юралiс Ф. А. Сыстеров, А. Н. Радостев, И. К. Климов составын делегация Москваö мунöм понда. Нiя пантасьлiсö ВЦИК- лöн председателькöт М. И. Калининкöт предложеннеöн öтлаöтны округсö Коми-Зырянскöй областькöт. Но делегаттэзлöн предложеннеыс Михаил Ивановичöн да партиялöн Центральнöй Комитетöн эз вöв примитöм. Коми-Пермяцкöй округ пырис ыджыт Уральскöй область составö.

Страналöн административно-территориальнöй вежсьöммез мунiсö одзлань. 1934 годö Уральскöй область вöлi торйöтöм Свердловскöй область (центрыс г. Свердловск), Челябинскöй область (г. Челябинск) и Обско-Иртышскöй область (центрыс г. Тюмень) вылö. Коми-Пермяцкöй национальнöй округ пырис Свердловскöй областьö.

Октябрь 3 лунö 1938 годö Свердловскöй областьлöн западнöй районнэз торись вöлi аркмöтöм Пермскöй область, кöда составö и пырис Коми-Пермяцкöй национальнöй округ. Июль 10 лунö сiя жö годö Кудымкар лоис городöн.

1940-сянь 1957 годöдз Пермскöй область шусис Молотовскöйöн. Чулалiс 20 год. СССР-лöн 1977 годся виль Конституцияын Коми-Пермяцкöй национальнöй округ пондiс шусьыны Коми-Пермяцкöй автономнöй округöн и пырис Пермскöй область составö.

1992 годö Федеративнöй договор подпишитöм бöрын, кöда определитiс Российскöй Федерациялiсь административно-территориальнöй устройствосö, быдöс автономнöй округгес лоисö Российскöй Федерациялöн самостоятельнöй субъекттэзöн, но формальнöя кольччисö областтез да крайез составын. Коми-Пермяцкöй автономнöй округ да Пермскöй область коласын отношеннеэс регулируйтчисö специальнöй соглашеннеэзöн. Сiдз округын олiссез участвуйтiсö Пермскöй крайлiсь губернаторсö бöрйöмын.

2003 годö чулалiс референдум Коми-Пермяцкöй автономнöй округ да Пермскöй область öтлаöтöм понда. И кыдз результат, декабрь 1 лунö 2005 годö вöлi аркмöтöм РФ виль субъект – Пермскöй край.

Справочнöя:

Яков Кукшич Пасютин (1898-1937) чужис Кудымкарын, кончитiс Уфимскöй педагогическöй университет, уджалiс Коми-Пермяцкöй округлöн, Уральскöй областьлöн и Калининскöй областьлöн советскöй да партийнöй органнэзын. Арестуйтöм 1937 годö, вийöм. Реабилитируйтöм кулöм бöрын.