1/1

Революция вотöдз герббесö сетавлiсö губернияэзлö, областтезлö, губернскöй да уезднöй городдэзлö. Сiйöн 1917 годöдз Кудымкор селолöн эз вöв аслас символ. Виль советскöй государство эз примит царскöй кадлiсь кольöммесö. Гербовöй символикаыс кольччис дзир Советскöй Союзлöн да сы республикаэзлöн. И лишь война бöрын, 1950-öй годдэзсянь городдэзлöн вились пондöны мыччасьны асланыс символлэз.

Коми-пермяккезлöн город получитiс ассис гербовöй щитсö 1983 годö гожумнас. Легендарнöй герой Кудым-Ошöн öдззöтöм, Дмитрий Сергеевич Евстигнеев керис Кудымкарлiсь медодзза символ – лазоревöй фон вылын шагнялан золотöй ошöс. Геральдическöй геройöс, кöда йитöм национальнöй орнамент элементтэзöн, кытшöвтöны шеппез да лыса пулöн уввез, мый баитö коми-пермяцкöй крайлöн няньöн да вöрöн богатство йылiсь. 1997 годöдз золотöй ош берегитiс городсö.

XX век конецын Кудымкар босьтiс виль символ, кöда керöм Виталий Николаевич Оньковöн. Лазоревöй контурын серебрянöй ыб кузя мунö червленöй ош, туйсö кöдалö, кыдз туймыччалан звезда, югдöтö лазоревöй «перна». 2008 годö Кудымкарскöй городскöй Думаöн вöлi утвердитöм герблöн медбöрья редакция, кöда мыччалö геральдическöй символикасö – «мунiсь ошлöн эмблемаыс символизируйтö одзлань мунöм, духовнöй да физическöй выннэзлiсь зоралöм, одзланьын уверенность, бур стремленнеэзын чорыт, лоö спокойствие да мир радейтан знакöн».