1/1

Коми-Пермяцкöй книжнöй издательство–странаись национальнöй издательствоэзiсь медодзза  - вöлi аркмöтöм 1930 годö январь месяцö. 80 годöн самостоятельнöя уджалiкö сiя лэдзис 1800 наименованнеа небöг, кöдö пыр торйöтiс мöдiккезсянь вылын художественнöй уровень да полиграфическöй культура. Печатнöй продукциялöн быдсöн тиражыс составитiс 3,5 миллион экземплярся унажык.

Издательствоын не öтiк кадö уджалiсö нiя, кин лоö национальнöй культуралöн гордостьöн: коми-пермяцкöй литературалöн основоположник М. П. Лихачев, гижиссез С. И. Караваев, М. Д. Вавилин, В. Я. Баталов, В. В. Климов, Ф. С. Истомин, Л. А. Косова, художник А. В. Мошев, учебниккезлöн автор, методист А. Т. Мошегова и мöдiккез.

Национальнöй небöглэдзанлöн легендаöн лоö Людмила Петровна Ратегова, кöда юралiс книжнöй издательствоöн 1987-2010 годдэзö. Эта кадö куимись содiс лэдзöм книгаэз наименованнеэзлöн лыдыс, паськалiс нылöн жанрово-видовöй ассямаыс: унажык пондiс печатайтсьыны учебно-методическöй, научно-популярнöй, краеведческöй, справочно-энциклопедическöй, музыкальнöй да мöдiк литература коми-пермяцкöй кыв вылын. Медбы локны сэтшöм успеххез дынöдз, колiс лоны не дзир талантливöй юралiсьöн, но и пыдына тöдны да радейтны чужан кыв. «Парма» газеталö (02.02.2012 г.) интервьюын Людмила Петровна висьталiс: «Менам практикаын быдöс гижиссес пользуйтчисö литературнöй кылöн. Эта коста зэв тшöка употребляйтiсö диалектнöй кыввез. Миян издательствоын диалектнöй кыввесö эзö примитö, а ме убеждайтi, что колö нiйö кольны литературнöй произведеннеас и керны сноскаэз. Ойланьын сэтшöм бытшöм кыввес эмöсь, мыля бы нiйö не пыртны. Мый йитсьö виль кыввезкöт, то ог уськöт тöдвылö, медбы гижиссез увлекайтчисö неологизммезöн. Ме аслам натура сьöртi консерватор, сiйöн лыддя, что виль кыввесö колö пыртны кылас думайтöмöн, умереннöя».

              Коми-Пермяцкöй книжнöй издательствосö бура тöдöны Кудымкар сайын. Сiя участвуйтiс всероссийскöй да международнöй книжнöй ярмарка-выставкаэз вылын, конкурссэзын и  не öтпыр шедтывлiс вылын наградаэз:

- 1977 годö Букварь (коми-пермяцкöй кыв вылын) босьтiс бронзовöй медаль Лейпцигын (ГДР) Международнöй выставка вылын, отметитöм Всесоюзнöй да Всероссийскöй конкурссэзлöн дипломöн художественнöй оформленне да полиграфическöй исполненне понда.

- 2002 годö «Литература родной Пармы» учебник отметитöм «Лучшая книга года» Всероссийскöй конкурслöн Почетнöй грамотаöн.  

- 2008 годö В. В. Климовлöн этнографическöй очерккез «Оланвужжез» (Корни бытия) отметитöмöсь Пермскöй крайын культура да искусство сфераэзлöн премияöн.

Талун Коми-Пермяцкöй книжнöй издательство уждалö Коми-Пермяцкöй этнокультурнöй центр составын.