1/1

Коми (пермяцкöй) округлöн картаись фрагмент, 1935 во.

Туйез вöлiсö и кольччöны öнняся Кудымкар и Коми-Пермяцкöй округ зоралöмын медважнöй проблемаöн. 90 годся унажык ни чулалiс сiя кадсянь, кöр вöлiсö керöмась медодзза оськöввез сiйö тыртöм понда. Эта йылiсь интереснöя и образнöя гижöм «Дорожное строительство Коми (пермяцкого) округа за 10 лет 1925-1935 год» округись исполкомлöн отчетын. Сiя пондöтчö 1925 годся туйезлiсь состояннесö мыччалöмсянь: 2450 туйезлöн километрись дзир 4,6 % вевттьöмась гравийöн, 12,2 лоöны грунтовöйезöн, туянаэзöн телегаэзöн мунöм понда, а 83,2 % туй кузя «погоддя сьöртi, мунлiсö подöн, верзьöмöн, доддезöн или волокушаöн» (4 с.). Дзир öтiк Кудымкар-Пожва гравийнöй туй сетлiс возможность округись олiссезлö петны Кама дынö.

Зоралан Коми-Пермяцкöй национальнöй округ корис туйезлiсь проблемасö медчожа тыртöм. Этасянь 1925-сянь 1935-öй годдэзöдз гравийнöй исполненнеын Обва ю пыр дзуг пос вуджанöн вöлi строитöм «Менделеево-Кудымкар-Юрла» областнöй значеннеа туй, кöда сетiс возможность петны Транссибирскöй кöрт магистраль вылö. Отчетлöн авторрез кыввез сьöртi сылöн строитöмыс вежис олансö не дзир кудымкарсалiсь: «Сэтчин, кытöн 2-3 год сьöрна позис мунны дзир верзьöмöн или волокушаöн, а мунöм вылö колiс 3 или 4 лун – аркмис 3-4 часа грузовöй да пассажирскöй машинаэзлöн ветлöм, кыдз гожумöн, сiдз и тöлöн (5 с.). Туйезлöн строитöмыс мунiс не дзир бюджетiсь сьöм вылö (висьталöм кадö видзöм 6369,4 тысяча руб, этö примернöя лоö 226750,6 тысяча руб, лыддьыны кö öнняся рубсö доллар дынö), сiдз жö активнöя и паськыта отсалiс местнöй населенне. Видзöтан документын касьтылöм успешнöй удж Кудымкарскöй поселковöй советлöн, кöда «тыртiс 1935 годö гравий да вöр заптöм сьöртi план 100% вылö. И пессьö торцовöй мостовöй керöм понда». (11 с.).

Отчетлöн авторрез не только рапортуйтiсö керöммез йылiсь, но и мыччалiсö туйез строитöмын падмöтаннэсö. Öткö, нылöн кузяыс ыджыт, а округись олiссезлöн плотностьыс учöт, олö дзир 5,4 морт öтiк квадратнöй километр вылын. Мöдкö, профессионаллэз-туй строитiссез абу: 1935 годö быдöс Коми-Пермяцкöй округас уджалiсö 2 инженер. 13 техник и 37 туй мастер.

Уджлiсь итоггез керикö, докладлöн авторрез гижöны: «Туй, кöдö мунiс «волокушасянь-машина вылö» округись йöз миян партия да советтэз юралöм увтын, быдöс странаись уджалiссез отсöтöн, лоö ыджыт шедтöмöн. (14 с.).

Источник: Дорожное строительство Коми (пермяцкого) округа за 10 лет 1925-1935 год. Кудымкар: Издание Коми (пермяцкого) окрисполкома, 1935. 30 с.