1/1

1917-1922 годся быдöс шума российскöй событиеэзiсь сувтчам дзир öтiк вылын – национальнöй вопрос решитöм вылын. Öтiкöн народнöй комиссаррез Советлöн ноябрь 15 лунся 1917 годся (виль стиль сьöртi) медодзза документтэзiсь лоис «Декларация прав народов России», кöдаын вöлi закрепитöмась виль социалистическöй государствоись национальнöй политикалöн базовöй принциппез.1922 годлöн медбöрья луннэзö Советтэзлöн I Всероссийскöй съезд вылын вöлi аркмöтöм Советскöй Социалистическöй Республикаэзлöн Союз (СССР). Но уна йöз, кöда олiс вились аркмöтöм государство территория вылын, босьтiс не öткодь суверенитет: öтiккез – союзнöй республикаэзлiсь статус, мöдiккез – автономнöй республикаэзлiсь союзнöй республикаэз составын, автономнöй областтез – крайез составын, а национальнöй округгез вермисö лоны дзир крайын или областьын. Сiйöн февраль 26 лунö 1925 годö Коми-Пермяцкöй национальнöй округ вöлi аркмöтöм Уральскöй область составын. Сылöн административнöй центрöн лоис село Кудымкор, кöда 1931 годö получитiс городскöй типа поселоклiсь статус.

1925-сянь 1938 годöдз Кудымкор öддьöн вежсис. 1927 годö селоын лоö электричество. Чожа зорамö народнöй потребленне товаррезлöн да сеянлöн лэдзöм, кöда медодз видзсис промышленнöй да потребительскöй кооперация зоралöм вылын. 1928 годö вöлi осьтöм металл керан завод «Красный молот», а вит год бöртi лен лöсьöтöм понда пондöтчис уджавны Кудымкарскöй льнозавод. 1934 годö пондöтiс ассис уджсö  8 номера государственнöй мельница, кöда быд лун изiс 90 тонна пизь.

Эна годдэзö пондöтчис безграмотность орöтöм понда кампания, и вöлi сетöм старт профессиональнöй кадррез лöсьöтöм понда образовательнöй система аркмöтöмлö. 1927-сянь 1932 годöдз оссисö Кудымкарскöй педучилище, Кудымкарскöй лесотехникум, Коми-Пермяцкöй сельхозтехникум, Торгово-кооперативнöй училище, Кудымкарскöй медучилище. Пондiс активнöя зорамны и здравоохраненне. 1925 годö Кудымкарскöй районнöй больница лоö окружнöйöн, а 1929 годö сы дын оссьö неотложнöй скорöй помощлöн отделенне. Эта десятилетие коста учöт челядьлöн кулмыс чинiс 15-ись.

Кудымкар лоö и национальнöй культура зоралöмлöн центрöн. 1935 годö оссьö Коми-Пермяцкöй А. М. Горький нима драматическöй театр, нуöтöны ассиныс активнöй удж окружнöй музей и библиотека. 1930 годö оссьöны медодзза звуковöй кинотеатр, окружнöй книжнöй издательство, а куим год бöртi и типография. 1927 годсянь лоö пырся радиовещанне.

Эна годдэзö Кудымкор лоис и Коми-Пермяцкöй национальнöй округлöн административнöй центрöн, кöдаын уджалiсö партийнöй, советскöй, судебнöй да правохранительнöй органнэз.

Кывчукöр

Уральскöй область (1923-1934 годдэз) – аркмöм РСФСР-ись кöркöся Пермскöй, Екатеринбургскöй, Челябинскöй и Тюменскöй губернияэзлöн территория вылын (площадьыс -1659 тысяча квадратнöй километр, населеннеыс – 6 миллион мортся унажык). Областнöй центрöн вöлi город Свердловск (öнi Екатеринбург).