Иньвенскöй вöрись дача
Российскöй империя коста Коми-Пермяцкöй округлöн öнняся территория вылын вöлiсö Чердынскöй да Соликамскöй уезддэз. Уезддэзö пырисö волосттез. Сiдз Чердынскöй уездiсь 23 волостись 11 вöлiсö Коми-Пермяцкöй округ территория вылын (Гаинскöй, Косинскöй, Кочевскöй, Юрлинскöй, Усть-Зулинскöй и мöдiккез). Соликамскöй уезд сулалiс 50 волостись, кöдна коласын вöлiсö Белоевскöй, Кувинскöй, Кудымкорскöй, Купросскöй, Ошибскöй, Пожевскöй, Юсьвинскöй да мöдiк волосттез.
Кудымкар или Кудымкор, кыдз гижлiсö нiя годдэзö, лэбтiсьöмын тöдчана роль орсiс российскöй предпринимателлез да государственнöй деятеллез Строгановвез тöдса семьялöн учöтжык улыс. 1702 годö нiя получитiсö Петр I-сянь былись царскöй козин – 100-ся унажык десятина му дассэз тысячаöн крепостнöйöн Обва да Иньва береггезöт. Эта вöра крайыс колiс Строгановвезлö, медбы босьтны древеснöй уголь совпуаннэз да строитчан металлургическöй заводдэз понда.
Тöдчана роль Кудымкорыс лэбтiсьöмын орсiс граф Строганов (1733-1811 г.г.) и сылöн монь графиня С. В. Строганова (1775-1845). Одзисьыс бöрйис Кудымкорсö Иньва ю береггез ыджыт территориялöн центрöн. Софья Владимировна аркмöтiс территорияöн юралöм системасö и определитiс Кудымкор посадсö Иньвенскöй вöрись дачалöн центрöн. Аркмöтiс условиеэз вылын уровеня юралiссез лöсьöтöм понда, кöдна йылiсь вермасö дзир думайтны öнняся бизнес-компанияэз.
Эна юралiссез да служащöйез уджлöн результатöн лоис не дзир посадiсь социальнöй сфералöн зоралöм, но и Коми-Пермяцкöй округись öтiк экономическöй - вöра отрасльлiсь – основаэз аркмöтöм да зорöтöм. Этаын участвуйтiс медодзза российскöй ученöй-лесовод А. Е. Теплоухов да сылöн уна велöтчиссез, кöдна коласын вöлi и И. Я. Кривощеков.
Сэтшöм вына сосед влиянне увтын посадын аркмисö административнöй властьлöн органнэз. Кыдз результат, 1897 годö Кудымкорын уджалiсö 9 участокись земскöй начальниклöн камера, судебнöй следовательлöн камера, 3-öт станiсь приставлöн квартира, волостнöй управленне, арестуйтöммез понда камера, куимöт уезд пасьта призывнöй воинскöй участок.
